Abstemius 48
De porco et eqvo
POrcus conspiciens equum bellatorem, qui cataphractus ad pugnam
prodibat, « Stulte inquit quo properas ? In pugna enim fortasse morieris. » Cui equus.
« At tibi inter lutum sordesque impinguato, quamuis nihil dignum laude gesseris
cultellus adimet uitam, mortem uero meam comitabitur gloria. »
Hæc fabula innuit honestius esse rebus præclare gestis occumbere, quam uitam turpiter
actam protrahere.