Abstemius 70

De mvre liberante milvvm

MVs conspicatus Miluum laqueo aucupis implicitum, misertus est auis quamuis sibi inimicæ, abrosisque dente uinculis euolandi uiam ei fecit. Miluus tanti immemor beneficii ubi se solutum uidit, murem nil tale suspicantem corripiens unguibus et rostro lacerauit. Fabula indicat malignos uiros huiusmodi gratias suis benefactoribus solere rependere.