Abstemius 23
De viro, qvi ad cardinalem nvper creatvm gratvlandi gratia accessit
VIr quidam facetus admodum et urbanus audiens amicum suum ad
cardinalatus dignitatem assumptum, ad eum gratulandi gratia accessit. Qui honore
tumidus amicum ueterem agnoscere dissimulans quisnam esset interrogabat. Cui ille ut
erat ad iocos promptus. « Miseresco inquit tibi cæterisque, qui ad huiusmodi honores
perueniunt. Quam primum enim dignitates huiusmodi estis assecuti, uisum auditumque, et
cæteros sensus ita amittitis, ut pristinos amicos amplius non cognoscatis. »
Hæc fabula eos notat, qui in altum sublati ueteres despiciunt
amicitias.