Abstemius 42
De trabe bovm pigritiam increpante
TRabs, quæ curru uehebatur, boues ut lentos increpabat dicens. « Currite
pigri, onus enim leue portatis ». Cui boues « Irrides nos responderunt ignara quæ te
pœna maneat. Onus hoc nos cito deponemus, tuum autem tu quoad rumparis, sustinere
cogeris. » Indoluit trabs, nec amplius boues conuiciis lacessere ausa est.
Hæc fabula quemlibet monet, ne aliorum insultet calamitatibus, quum
ipse possit maioribus subiacere.