Abstemius 53
De vlmo et silere
VLmus in ripa fluminis nata Siler sibi proximum irridebat, ut debile et
inualidum, quod ad omnem uel leuissimum undarum impetum flecteretur, suam autem
firmitatem et robur magnificis extollebat uerbis, quod multos annos assiduos amnis
impetus inconcussa pertulerat. Semel autem maxima undarum uiolentia Vlmus perfracta
trahebatur ab aquis. Cui Siler ridens inquit. « Cur me deseris uicina ? Vbi est nunc
fortitudo tua ? »
Fabula significat sapientiores esse, qui
potentioribus secedunt, quam qui resistere uolentes turpiter superantur.