Abstemius 14
De mvliere virvm morientem flente, et patre eam consolante
MVlierem adhuc iuuenem, cuius uir animam agebat, consolabatur pater
dicens. « Ne te afflictes tantopere, filia. Alium enim uirum tibi inueni isto longe
formosiorem, qui prioris desyderium facile mitigabit. » At mulier doloris impatiens,
ut quæ maritum ardenti amore prosequebatur, non modo uerba parentis non admittebat,
sed intempestiuam alterius mariti mentionem accusabat. At ubi maritum defunctum uidet
inter lachrimas et luctus parentem interrogat, an adsit ibi iuuenis ille, quem sibi in
uirum dare uelle se dixerat.
Fabula indicat quam cito
defunctorum maritorum amor ex uxorum animo excidere soleat.