Abstemius 51
De viro et vxore bigamis
VIr quidam defuncta uxore, quam ualde dilexerat, duxit alteram et ipsam
uiduam, quæ assidue ei prioris mariti uirtutes, fortiaque facinora obiiciebat. Cui ut
par referret, ipse quoque defunctæ uxoris mores probatissimos pudicitiamque insignem
referebat. Quadam autem die uiro irata pauperi elemosynam petenti partem caponis, quem
in cœnam utriusque coxerat, dedit dicens. « Do tibi hoc pro anima prioris uiri. » Quod
audiens maritus accersito pauperi reliquum caponis dedit dicens. « Et ego quoque do
tibi hoc pro anima uxoris meæ defunctæ. » Sic illi, dum alter alteri nocere cupiunt,
quid cœnarent non habuerunt.
Hæc fabula monet non esse contra
eos pugnandum, qui se possunt optime uindicare.