Abstemius 82
De lvpo pisce flvvii maris regnvm affectante
LVpus piscis erat in amne quodam, qui pulchritudine, magnitudine, ac
robore cæteros eiusdem fluminis pisces excedebat. Vnde cuncti eum admirabantur, et
tanquam regem præcipuo prosequebantur honore. Qua re in superbiam elatus maiorem
principatum cœpit appetere. Relicto igitur amne, in quo multos annos regnauerat
ingressus est mare, ut eius regnum sibi uendicaret. Sed offendens delphinum miræ
magnitudinis, qui in illo regnabat, ita ab illo insectatus est, ut aufugiens uix amnis
ostium ingrederetur. Vnde amplius non est ausus exire.
Hæc
fabula nos admonet, ut rebus nostris contenti ea non appetamus, quæ nostris uiribus
sunt longe maiora.